Die Aussies kry dit reg…
Die Aussies kry dit reg…Hulle oorheers krieket en hulle het sopas die magtige All Black rugbyspan gepootjie. Maar kyk, as daar nou een ding is wat die Aussies regkry, is dit om 
suksesvolle internasionale wyn-handelsmerke te skep. Hulle is baie voortreflik om ‘n deurlopende goeie standaard wyn teen ‘n billike prys te produseer en dit onder ‘n uniforme naam op die internasionale mark te plaas. Daarom kry jy in Suid-Afrika Yellow Tail wyne op jou plaaslike Woolies se rak, asook in Korea by die naaste supermark. Watter uitstekende waarde vir geld bied Yellow Tail wyne nie. En jy weet altyd wat jy kry. Teen die volumes wat dit geproduseer word, is hierdie prestasie des te meer prysenswaardig! Tans word 300 000 bottels Yellow Tail daagliks in die wereld gedrink en sedert 2001 is 25 miljoen kiste Yellow Tail internasionaal verkoop!
Neem nou byvoorbeeld die 2005 Chardonnay:
Goue, helder strooikleur. Die wyn is beduidend lig gehout en die hout affekteer glad nie die kultivarkarakter nie (soos so dikwels met Chardonnay gebeur). Op die neus is daar volop vrugtegeure. Kokosneut, vanilla en fyner nuanses van botter, suurlemoen en lemmetjie. Baie goeie suurbalans, geintegreer met die alkohol (13.5%) en suiker. Sag en met ‘n botterige, romerige nasmaak wat dalk getuig van appelmelksuurgisting (malolacatic fermentation ). Defnitief ‘n vars en goed gebalanseerde somerwyn. ‘n Treffer teen die pryspunt. En dit alles in aantreklike verpakking, met ‘n verbruikersvriendelike skroefdop. Wat ‘n wenner!
Hoewel dit knersend op my tande is, moet ek jou gelyk gee. Daar is heelparty dinge wat die Aussies regkry, wat ons maar gerus kan gaan leer.
Prosit!
mmm hulle het dit ook reggekry om die aal blacks die naweek te klop…..daai verdomde aussies
Ek dink ons haat die Aussies om dieselfde rede wat ek destyds, as WP-ondersteuner, vir Naas Botha gehaat het…
jy beskryf dit so mooi … ek kan nou al amper daardie wyn proe!!
Die Ausies is goed omdat hulle glo hulle is goed. Dit is waar die Amerikaners van die wa af gevoeter het – vandat hulle met die houding van “cause we say so” begin het.
Die Yellow Tail doen baie goed hier in Taiwan ook. Dit irriteer my mateloos dat dit so is. Dit moes eerder ‘n kameelperdjie op daai bottel gewees het.