Gyeongju Toring

‘n Hele rukkie terug het ek Gyeongju Culture Expo Park besoek. Dit is naby Bomun-meer en gedenk nie net Koreaanse kultuur nie, maar stel ook Koreane bloot aan ander wereldkulture. Daar is onder andere optredes deur Russiese ysskaatsers, asook volksmusiekgroepe uit ander Asiese lande wat periodiek optree. Aanvanklik wou ek skryf oor die wonderlike Brasiliaanse braaivleis wat ek ge-eet het, asook ander aspekte van die Expo, maar ek wil egter fokus op die indrukwekkende Gyeonju Toring. Wel…dis eintlik meer ‘n gebou, maar hulle noem dit “toring”.

Die gebou is maar net so onder die 100m hoog, maar dis nie waar die aantrekkingskrag van die gebou le nie. Dis die groot pagoda-vormige gat in die middel van die gebou, wat dit regtig uniek en modern-esteties maak. Ek weet nie of mens dit altyd as “mooi” sal beskryf nie, maar indrukwekkend is dit beslis! Die ander aspek wat die gebou die moeite werd maak, is die pragtige uitsig op Gyeongju en omliggende gebiede vanaf die boonste vloer. Van bo-af kan die Bomun-area baie mooi gesien word, asook die geelryp rysvelde, Shilla Millenium Park* en die pragtige tuine van die Expo Park . Maar wat my die meeste bybly is die gesig van die Dame van Silla, wat so pragtig geplavei is op die grond onder die gebou. Hierdie is die simbool van die Silla -geskiedenis. Tydens opgrawings is ‘n eeu-oue dakteel van ‘n Silla-woning gevind. Die teel het ‘n glimlaggende vrouegesig uitgebeeld, maar was plek-plek reeds gebreek.

(Die uwe het natuurlik met twee gelukbringers ook geflankeer, maar dit het nou nie veel met die res van die storie te doen nie!)

 

*https://boerinballingskap.wordpress.com/2007/10/26/shilla-millenium-park/