Oor vreemde kosse en dies meer

Om al die verskillende Koreaanse disse te probeer, is een van die interessantste en avontuurlikste aspekte daarvan om hier in die vreemde te wees. In Korea is die eetstyl drasties verskillend van die in Suid-Afrika en groot dele van die Weste. In die eerste plek sit jy gewoonlik plat op die grond by lae tafeltjies; in die tweede plek word die oorgrote meerderheid van die disse gemeenskaplik ge-eet; in die derde plek is daar altyd een hoofdis met ‘n swetterjoel klein bakkies van bykosse. Daar is dus nie die tradisionele “bord kos” nie en niemand het as’t ware hulle “eie” kos nie. Almal eet met hulle eetstokkies saam aan die hoofdis, asook die talle bykos-bakkies. Aanvanklik is hierdie eetstyl vir mens taamlik anargisties, maar mens raak gou gewoond daaraan en naderhand begin jy hierdie gesellige manier van eet geniet.

Samgyopsal is ‘n baie algemene en gewilde Koreaanse dis en ook een van my eie gunstelinge. Oor die algemeen is Koreaanse kosse baie gesond, maar samgyopsal is een van die min cholestrol-gedrewe disse (seker hoekom ek dit dan ook so baie geniet…).

Dit bestaan hoofsaaklik uit gesnyde, spekryke repies varkvleis (meestal gemarineerd of ten minste ge-spesery) wat aan tafel gebraai word op ‘n gas-of houtskool braaier. Dit word egter nie alleen gebraai nie, maar saam met knoffel (deel van byna elke Koreaanse dis), uie, sampioene en soms selfs pampoen en rysrolletjies. Die bykosse (wat van restaurant tot restaurant verskil) kan bestaan uit enige kombinasie van bakkies met kimchi* (gefermenteerde kool wat gegeur is met hope rooipeper en knoffel), pajeon (‘n tipe Koreaanse pannekoek) slaai, groen uie, gesnyde radys, tofu, aartappeltjies, groenrissies, wortels, komkommer, spinasie en rys. Soms glip daar selfs ‘n bakkie grondboontjies of ‘n seekatpootjie in.

Die klaargebraaide repies spek word met ‘n sker opgeknip, waarna jy dit kan doop in sojapasta en/of sesame-olie. Daarna plaas jy die stukkies spek saam met die bykosse van jou keuse en die gebraaide uie, knoffel ens. in ‘n sesame- of slaaiblaar (gesamentlik bekend as ssam). Jy vou die blaar om die inhoud in ‘n groen bondeltjie en sit dit in jou mond. Heerlik!

Byna alle gebraaide vleisgeregte in Korea word op hierdie “blaarmetode” ge-eet. Dit klink sekerlik baie vreemd, maar is nogal baie lekker. Ander gewilde Koreaanse braaigeregte sluit in dejigalbi (die vleis van varkribbetjies), bulgogi (repies beesvleis), sogalbi (beesribvleis), origogi (eend) en takgogi (hoender). Bulgogi is by verre die gewildste (en duurste) van hierdie braaigeregte. Dis egter baie lekker en word aan tafel met ‘n rooster op houtskool gebraai – die naaste wat jy ooit aan ‘n regte braai sal kom hier in die Ooste!

 

*Kimchi is Korea is se kenmerk nasionale dis. Ek het dit hierbo baie eenvoudig beskryf. Daar is inderwaarheid baie verskillende soorte en variasies. Die Koreane is omtrent oor hulle kimchi soos die Franse oor hulle kase. Om behoorlik oor kimchi te skryf, is ‘n inskrywing opsigself…