Skip to content

Hoe die Koreane bruilof hou

Desember 21, 2008
tags: ,

S7300308Nou kyk, as jy na jou eerste Koreaanse troue genooi word as die enigste gas wat nie ‘n Koreaan is nie, moet jy bevoorreg voel. Jy staan weliswaar uit soos ‘n vlieg op ‘n troukoek (by wyse van spreke) en jy is die die objek van deurlopende nuuskierige kyke (waar kom die mooie bruid dan aan hierdie volksvreemde manlike vriend?). Maar ‘n eer is dit verseker en jy geniet elke vreemde oomblik, net soos jy al jou vreemde ervarings in die Ooste jou telkens opnuut verras.

Natuurlik gaan jy vol verwagting na die troue om tradisionele hanbok-uitrustings te sien en moontlik om die vreemde Confucsiaanse of S7300305Boeddhistiese rites wat jy nie aan gewoond is nie, te ervaar. Die Koreane is tog baie tradisievas! Maar, o-nee! Behalwe vir ‘n paar variasies op die tema, verskil dit op die ou-end nie dramaties van ‘n tradisionele Afrikaner-troue nie, behalwe dat dit uiters kitsch is. Nou moet ek dadelik byvoeg dat dit wat vir Suid-Afrikaners (en moontlik ander westerlinge) kitsch is, vir Koreane alledaags is en inderdaad baie aanvaarbaar.

S7300300In elk geval. Troues in Korea vind oor die algemeen nie in kerke plaas nie, maar in sg wedding halls, waarvan Korea vervuil is. Die wedding halls vorm gewoonlik deel van hotelle en is net wat dit se: ‘n saal vir troues. Die saal word op die Saterdag (en ander dae) al om die uur uitgehuur en die gelukkige trou-paartjies gaan soos deur ‘n worsmasjien. Elkeen het net ‘n uur en dan is dit die volgende paartjie se beurt. En so word hulle uur-om-uur deur die loop van die hele dagS7300322 ingeryg. Die plastiekblomme (wat aanvanklik eg lyk) bly sommer deurentyd daar vir elke volgende paartjie. Net so die verhogie en die plastiekruikers aldaar. Net die bruid se handruiker is eg en wisselend. Net so met die troukoek. Die vierlaag wit koek lyk op ‘n afstand indrukwekkend, maar by nadere ondersoek kom mens agter dat slegs die klein boonste laag in werklikheid ‘n egte koek is! Dus bly die “troukoek” daar staan en dis net die boonste laag wat met elke troue wissel. Die kerse langs die paadjie brand darem egte vlamme, maar hulle vertoef ook heeldag daar om al om die uur gesnuit te word en dan weer gebrandsteek te word.

S7300295Voor die troue in aanvang neem, sit die bruid neffens die trousaal in ‘n S7300309bruidskamer. Hier sit sy met haar trourok soos ‘n wafferse model en posseer vir elk se kamera. Dis hier waar al die vriende en familie haar kan gelukwens en saam met haar vir foto’s kan posseer. Die bruidegom staan stywerig buite die trousaal saam met pa en groet almal met ‘n handdruk. Vooraf in die saal word daar op ‘n wit skerm ‘n projekvertoning gelewer van die talle romantiese foto’s van die bruidspaar wat hulle voor die tyd reeds in ‘n verskeidenheid uitrustings laat neem het – dit met begeleiding van tranerige Engelse liedjies van oa Celine Dion en Enya .

S7300320Dan is dit tyd vir die troue om te begin. Al die gaste gaan sit, die projektor word afgeskakel en die ligte gedoof. Eers stap die bruidegom van agter in met luide marsmusiek. Daarna kom die bruidegom met haar pa ingestap op darem die tradisionele troumars. Voor gaan staan hulle by die oorversierde wit kateder, waaragter ‘n bejaarde omie met groot, dikglasbrille ongeveer ‘n volle 20 minute met hulle praat.S7300293 Wie is die omie? Niemand kon vir my se nie, maar ‘n predikant of priester is hy nie. Skynbaar een of ander Confucsiaan, goedgeskool in die reels van die liefde. Terwyl hy praat, is daar weining belangstelling by die gaste. Daar word gesels, opgestaan, bene gerek, in-en-uitgeloop en lustig op selfone gesels. Uiteindelik is die omie klaar, die troukoek word onder luide handeklap gesny en dan word menige foto’s van die bruidspaar, vriende en familie geneem. Almal is verheug, want nou kan daar in die eetsaal ge-eet word.

S7300319Hier moet ek byvoeg dat die hele seremonie gepaardgaan met die sporadiese masjiengedrewe blaas van seepbelle, kunsmatige sneeuvlokkies wat op strategiese oomblik op die paartjie neerdaal en die die wit kunsrook wat tydig en ontydig losgelaat word om die paartjie soos wafferse rock-sterre te omhul. En as hulle uiteindelik uitstap, die blink linte wat met ‘n harde knal oor die paartjie en gaste heen geskiet word.

Ewenwel, ek haas my saam met die ander gaste na die eetsaal. Daar wag op my ‘n groot buffet deurspek met tipiese Koreaanse kosse. Van die smaaklikste is natuurlik die sushi, hwe (rou vissnitte), yukwe (rou S7300324beesvleis) en die alomteenwoordige kimchi. Die tafels en stoele staan lang rye, elk met ‘n bottel of twee bier en soju vir die gaste om te geniet. Almal eet en drink en gesels ongekunsteld en sonder enige spanning, In my beste gemolesteerde Koreaans verneem ek na die bruidspaar se omswerwinge, want hulle is tekenend afwesig by die feesmaal. Nee, verneem ek, hulle is besig met die tradisionele Koreaanse trou-seremonie, in hanbok -uitrustings, saam met die naaste familie op die hotel se 8ste vloer. Uit die aard van die saak kan die verlangse vriende en familie nie hierdie privaatseremonie meemaak nie.

S7300297‘n Halfuur later staan ek op na ‘n lekker feesmaal en saam met menige gaste gaan ek na buite en neem die bus terug huis toe. Ek het gekom, gesien en ervaar. Inderdaad anders, maar interessant en die moeite werd. Nes ek die Koreane ken: Gefokus op die essensie, vinnig en sonder onnodige fieterjasies, toesprake en dies meer.

Dis hoe die Koreane bruilof hou.

Advertisements
27 Kommentaar leave one →
  1. Desember 22, 2008 12:58 vm

    Baie interessant, boer! Ek het hierdie inskrywing rerig geniet. Ek weet net nie mooi van daardie rou vleise nie. Die hele gedoente is gou en oor ens., maar klink bietjie “plastiek” – soos jy se…kitsch-erig vir my. Dalk is die privaatseremonie meer gepas vir so ‘n troue en meer betekenisvol.

  2. Desember 22, 2008 1:33 vm

    Beslis baie interessant! My mond sou oopgehang het by aanskoue van al hierdie gebeure! Ek stem saam met Nikita, dit was ook my eerste gedagte dat dit plastiekerig klink. Kan nie help om te wonder wat hulle dan tydens die tradisionele seremonie doen nie. Is die hanbok uitrusting die helderkleurige klere wat Kaalvoet ook al van vertel het?

  3. Desember 22, 2008 3:43 nm

    Jissie, ek moet weer trou! Ek het skoon uitgemis op die borrels, sneeu en rook!

    Lekker inskrywing BiB!

  4. Desember 22, 2008 10:51 nm

    Dis nou soos wanneer daar te veel icing op die koek gesit is…. jy is so versadig van al die icing die koek proe nie eers lekker nie! 😆

  5. boendoe permalink
    Desember 23, 2008 10:34 vm

    Klink na ‘n formaliteit wat so vinnig as moontlik afgehandel moet word. Interessant, maar ek’s bly dit was nie my lot nie! Om so te trou, bedoel ek. 😉

  6. Desember 23, 2008 1:43 nm

    Ek love die idee van die borrels! Koreaanse troues klink cool. Ek hou ook daarvan dat die bruidegom ‘n geleentheid kry om ‘n entrance te maak. Maar die bruid wat voor die troue uitgestal word, voel vir my effens verkeerd. Hoe kan jy nou ‘n properse entrance maak met trompetgeskal as die hele onthaal jou al gesien het?

  7. Desember 23, 2008 1:43 nm

    Baie interessant, amper dog ek ek sien Ta’ Miekie slaan met die hansambok!
    Ek wens jou sommer ‘n gesëende Kersfees ook.

  8. Desember 23, 2008 5:07 nm

    ‘n Baie oulike inskrywing BiB
    Mag hierdie Christusfees vol liefde wees vir jou. ‘n Baie geseënde Kersfees.

  9. Desember 23, 2008 6:57 nm

    hehe, dankie vir die foto’s. dis nogal interessant hoe westerse kultuur se pad in asië ingewurm het (alias celine dion, die ruiker en die wit bruikdsrok).

  10. Desember 23, 2008 8:48 nm

    Ek weet nie wat presies tydens die tradisionele seremonie gebeur nie, maar dis slegs die ouers en grootouers wat daarby betrokke is. En dit is dan juis ook die geleentheid wat hulle die hanbok dra (soos Kaalvoet na verwys het).

    Daar is baie kitsch in Korea, maar (soos ek genoem het) is dit hier normaal en aanvaarbaar – dit wys mens maar hoe perspektiewe verskil. Hoe “cool” die troue is, weet ek nie – terwyl ek daar was het dit by my opgekom dat dit seker vir mens ‘n voorsmaak gee van Vegas se klatergoud-kitstroues. Ook ‘n bewys van die Westerse invloed. Of moet ek eerder se Amerikaanse invloed. As ek nou een stukkie kritiek teen die Koreane het, is dat hulle geweldig die Amerikaanse kulturele voorbeelde en strominge navolg. Maar dis ook seker maar deel van die noue verbintenis met die VSA sedert die Koreaanse Oorlog.

    Kop en Zee, baie dankie – seenwense vir julle ook!

  11. Desember 24, 2008 1:24 vm

    Skies maar hemel, hulle lyk nes poppe. Die tradisionele ene seker ouliker. Ek was in Boston by Japanese tee seremonie. Baie fyntjies. Mens moet die taal kan praat om hulle kultuur te vertsaan. Vir my is hulle nes poppies. Dit was ook heel moontlik ‘n gereëlde huwelik.

    Jy het nogal ‘n mooi bruin pak aan Bib. Jy lyk heel vrolik. Volgende is skr hoe die Koreane Kersfees vier.

    Geseénde Kerstyd Broer.

    Annora.x

  12. Desember 24, 2008 7:00 nm

    Bib, ‘n ryk en geseënde Kerstyd vir jou en jou geliefdes.

  13. Sammi permalink
    Desember 24, 2008 8:08 nm

    Boer
    Ek dink jy moet huis toe kom – Kaap toe! Sommer vir altyd!
    Dankie vir jou wense en hiermee vir jou ‘n groot druk daar in die verte – mag jy goeie vriende by jou hê more!

  14. Desember 24, 2008 8:12 nm

    BIB ‘n Wonderlike Geseënde Christusfees vir jou daar in die vreemde… Mag jou vriende naby en ver jou toevou in hul liefdeskombersie en mag jy tog ook daar deel hê aan blydskap van die Een wat vir ons gebore is!!! ♥♥♥

  15. Desember 24, 2008 8:13 nm

    Dankie vir die wense Emil, Annora en Sammi. Ek wens julle ‘n geseende feestyd toe!

  16. Desember 24, 2008 8:14 nm

    En Pik…toe kom jou kommentaar deur terwyl ek besig is met my eie kommentaar! Dankie vir jou wense. Dieselfde vir jou hier uit die koue verte.

  17. Wipneus! permalink
    Desember 24, 2008 9:25 nm

    Alweer ‘n fantastiese inskrywing!!! Ek het heerlik by jou gekuier en gesels weer in 2009!!!
    Geseënde Kersfees en voorspoed vir die nuwe jaar vir jou en jou geliefdes Bib!
    😛

  18. Desember 25, 2008 1:45 vm

    ‘n Geseende Kersfees vir jou! Ek hoop jou dag is vol vreugdevolle verrassings…! Mag 2009 ook ‘n goeie, vriendelike en Voorspoedige Jaar wees!

  19. Desember 25, 2008 12:49 nm

    Dankie vir al jou baie interessante en kleurvolle inskrywings hierdie jaar! Mag jy ‘n baie geseënde Kersdag hê en mag die nuwe jaar vir jou net voorspoed en geluk inhou!

  20. Desember 25, 2008 11:17 nm

    Baie dankie! Dieselfde vir julle! Dit was ‘n baie koue, winderige Kersdag hier in die vreemde, maar ek het dit geniet!

  21. Desember 26, 2008 1:57 nm

    Heel interessant Bib, maar ek trou liewer voor die magistraat voor ek so plastiek besigheid moet aanskou 😉

    Moet se dat die begrafnisse ook nogal iets is om te beleef…ons kan nou bietjie gedagtes uitsruil aangesien jy by die troue was en ek by die begrafnis!

    Kersdag was inderdaad vieslik koud en mens moes eintlik net in die bed bly en die komberse oor jou kop trek… Hoop jy het ‘n heerlike en Geseende dag gehad. Ek het my Kersdag baie geniet ten spyte van die koue! Skuus my Kerswens is bietjie laat, maar ek het nog steeds nie ‘n rekenaar nie en wag in spanning! Roof vandag weer internet by die werk!

    Die Koreane kan gerus ook maar die 26e as vakansiedag verklaar…

    Lekker naweek!

  22. Desember 26, 2008 9:17 nm

    Ek hou duimvas dat jy spoedig ‘n rekenaar sal he, want ons mis jou kleurvolle inskrywings. En, ja – as daar nou een ding is waar die Koreane afsteek by die res van die wereld, is dit vakansie hou!

  23. Roer permalink
    Desember 27, 2008 6:46 nm

    Maggies maar dit was nou interessant. Ek is jammer, maar dit sal vir my baie moeilik wees om nie te giggelnie, veral vir die rook wat uitgeblaas word. Dis om die minste te se^ ‘over-the-top’, maar soos jy se^, persepsie. Ek is baie nuuskierig om te hoor hoe klink jou Koreaans… Hoe lyk dit met ‘n podcast?

  24. amanda permalink
    Desember 28, 2008 10:48 vm

    LOL – ek het hierdie inskrywing gate uit geniet!
    Hoop jou Kersfees was goed!

  25. Desember 28, 2008 9:55 nm

    Roer…hoe klink my Koreaans…nie veel beter as my studente se Engels nie!!! 😆

    Dankie, amanda, voorspoedige Nuwejaar vir jou en jou mense!

  26. Mary Jane permalink
    Januarie 9, 2009 10:27 vm

    Hi BIB-(lioteek) Jissie man, hierdie inskrywing nou vreeslik baie geniet! Dit klink en lyk inderdaad “anders”. Soos in Vegas-anders. In elk geval, behoort volgende week in Indiana te wees en dan ook meer tyd te he om te mail en op te vang. Dis nou as ons die internet gereel kan kry.

    Groete daar!

  27. Januarie 11, 2009 11:57 nm

    MJ, goed om weer van jou te hoor! Hoop julle vind gou julle voete en dat julle sommer vinnig internet kry!

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Verander )

Twitter picture

Jy lewer kommentaar met jou rekening by Twitter. Log Out / Verander )

Facebook photo

Jy lewer kommentaar met jou rekening by Facebook. Log Out / Verander )

Google+ photo

Jy lewer kommentaar met jou rekening by Google+. Log Out / Verander )

Connecting to %s

%d bloggers like this: