Steurgarnale en skulpvis

Word ek toe mos die afgelope naweek genooi om saam met ‘n paar Koreaanse kollegas te gaan steurgarnale eet. Op hierdie punt wil ek my nie in die semantiese mynveld begeef oor wat steurgarnale (prawns) is en wat nou eintlik garnale (shrimps) is nie. Soos meestal in die VSA gebeur, word beide steurgarnale en garnale in Korea shrimps genoem, ongeag die grote. In elk geval…so sien ek toe uit na ‘n hele bord vol pienk gaargemaakte steurgarnale, soos ek dit ken (en al voorheen hier in Korea ge-eet het). Maar hier leer ‘n mens keer-op-keer dat jy nie altyd weet wat om te wagte te wees nie…

Aangekom by die restaurant, word die bestelling geplaas en na ‘n wyle kom ‘n dametjie nader gestap, kompleet met oulike wit handskoentjies en ‘n hele bak lewendige steurgarnale. Om die waarheid te se, hulle is so lewendig, toe sy die deksel afhaal het twee van hulle (in ‘n waarskynlik futiele ontsnappoging) op die tafel gespring. Sy sit die borde mooi voor ons reg en en begin toe onseremonieel die tienpotige gediertes se koppe een vir een afbreek. Daarna word die lyfie noukeurig ontdop en voor ons op die bord gele, met die stert wat nog so effe vladder. En so vinnig soos hulle op die groot bord verskyn, so vinnig word hulle opgeraap, gou in die wasabi en-sojasous gedoop en ge-eet. Ek was honger, so toe spring ek maar self in, gryp die flappende stertjie, druk in die sous en eet. Gelukkig is ek ‘n avontuurlike eter en eintlik is die rou steurgarnale toe heel lekker. As jy van sushi hou, behoort jy hiervan te hou (as jy daai bewegende stert kan ignoreer!).
Daarna is die koppe konvensioneel gaargemaak en ook verorber. Die res van die seekos-kombo het bestaan uit allerhande grote en vorms skulpvis (wat ek nie van ‘n kant af ken nie), wat deur dieselfde dametjie op die rooster daar aan tafel gebraai is. Dit was BAIE lekker en ek het genoeg sink en Vitamiene E ingekry op my vir die volgende 2 maande te hou!