Vir Ma

November 27, 2009 at 9:30 nm (Hoendervleis-woorde)

S7300584

“…people tend to see only the stubble fields of transitoriness but overlook and forget the granaries of the past into which they brought the harvest of their lives: the deeds done, the loves loved, and last but not least, the sufferings they have gone through with dignity and courage.

From this we may see that there is no reason to pity old people. Instead, young people should envy them. It is true that the old have no possibilities, opportunities in the future. But they have more than that. Instead of possibilities in the future, they have realities in the past – the potentialities they have actualized, the meanings they have fulfilled, the values they have realized – and nothing or nobody can ever remove these assets from the past.“

Victor Frankl in Man’s Search for Meaning

5 Kommentaar

32 spanne…1 doel

November 22, 2009 at 10:46 nm (Sport)
Tags: ,

2010 fifa world cup logo

Die uitspeelwedstryde is verby en al 32 spanne wat volgende jaar in Suid-Afrika sake gaan uitspook, is bekend. Hier volg die lys, met die spanne se huidige FIFA-rangorde in (hakies). Groepwenners van die kwalifiserende rondtes word in kursief aangedui en voormalige Wêreldbekerwenners in vetskrif. Spanne wat al in ‘n halfeindstryd gespeel het, is onderstreep. Spanne wat al in eindstryde gespeel het, maar verloor het, het ‘n asterisks* by.

EUROPA:

  • Spanje(1), Nederland*(3), Italië(4), Portugal(5), Duitsland(6), Frankryk(7), Engeland(9), Griekeland(12), Switserland(18), Serwië(20), Denemarke(26), Slowenië(33), Slowakye*(34)

AFRIKA:

  • Kameroen(11), Ivoorkus(16), Nigerië(22), Algerië(28), Ghana(37), Suid-Afrika(86)

SUID-AMERIKA:

  • Brasilië(2), Argentinië(8), Chili(17), Uruguay(19), Paraguay(30)

ASIË:

  • Australië(21), Japan(43), Suid-Korea(52), Noord-Korea(84)

NOORD-en SENTRAAL-AMERIKA:

  • VSA(14), Meksiko(15), Honduras(38)

OSEANIË:

  • Nieu-Seeland(77)

Al bogenoemde spanne het al ten minste eenkeer vantevore vir deelname aan die Wêreldbeker gekwalifiseer, maar die volgende spanne kon nog nooit daarin slaag om verder te vorder as die eerste rondte nie:

  • Algerië, Griekeland, Honduras, Ivoorkus, Nieu-Seeland, Suid-Afrika

Die voormalige wenners van die Wêreldbeker is:

  • Brasilië (1958, 1962, 1970, 1994, 2002), ), Italië (1934, 1938, 1982, 2006), Duitsland (1954, 1974, 1990), Argentinië (1978, 1986) Uruguay (1930, 1950), Frankryk (1998), Engeland (1966)

Op grond van bogenoemde informasie kan mens seker dink dat jy reeds kan begin met tentatiewe voorspellings, maar baie hang saam van hoe die spanne groepsgewys geloot word vir die Wêreldbeker. Die loting vind op 4 Desember in Kaapstad plaas. Daarna kan mens dalk in die kristalbal begin loer…

2 Kommentaar

Jou bagasie is bloot te swaar

November 17, 2009 at 11:13 nm (Politieke kommentaar)
Tags: , ,

Ek lees dikwels in die media en in die blogosfeer hoe daar kunstig gejongleer word met die term “Afrikaan”. Baie blankes (en veral Afrikaners) sien hulself as volwaardig Afrikaan en wil met alle geweld hulle selfdefinisie aan mede-landsburgers opdring. Daar is selfs diegene wat erkenning as Afrikaan skynbaar as hoër ideaal voorhou as bloot erkenning as Suid-Afrikaner. Is Afrikanerskap en/of Suid-Afrikanerskap bloot net nie goed genoeg nie? Waarom opsoek na nog ‘n etiket? Hoekom wil jy so graag as Afrikaan erken word? Waarom hierdie amperse Oedipuskompleks? Dink en tree jy op soos ‘n Afrikaan, is jou waardestelsel dieselfde, deel jy mee aan Afrika-kulture, tale, kosse, gelowe, danse, inisiasie, tradisionele troues ens.? Ondersteun jy enige van die historiese bevrydingsbewegings? Leef jy soos ‘n Afrikaan, of leef jy soos ‘n Europeër in Afrika (met die bykomende onrealistiese verwagting dat westerse standaarde in ‘n Afrika-land moet hoogty vier)? Die blote feit dat jy hou van potjiekos, braai, buitelewe en viertrekroetes maak nie van jou ‘n Afrikaan nie.

Maar selfs al sou jy kon voldoen aan al die kriteria om teoreties as Afrikaan te kwalifiseer, bly jou selfdefinisie steeds irrelevant. Hierdie irrelevansie word duidelik illustreer deur die feit dat jy bv. in die VSA nooit as ‘n Afro-Amerikaner beskou sal word nie (wanneer laas het jy iemand na Charlize Theron hoor verwys as ‘n “Afro-Amerikaner”?). Hou maar die internasionale media dop – daar is globale sensus dat Afrikane per definisie donkerkleurig is. En waar jy ook in die wêreld reis, hang monde oop van verbasing dat daar wit boorlinge uit Afrika kan kom.

Ek dink die situasie is duidelik: Dit gaan ten diepste oor jou velkleur en gevolglik hoe die huidige politieke elite, hulle volgelinge en die res van die wêreld jou beskou. Jy bly tog maar op die ou-end die setlaar, die voormalige onderdrukker wat nog geduld word, maar wat nooit onder die wanindruk moet verkeer oor wie se land Suid-Afrika nou eintlik is nie. Jy is en bly die objek waarop Afrikane hul historiese minderwaardigheidskompleks projekteer en waarop die westerse wereld hulle kolonialistiese skuldgevoelens stapel.

Jou velkleur en Europese afkoms diskwalifiseer jou nie slegs bloot daarvan om as Afrikaan erken te word nie, meer nog….jou stem en rol in Suid-Afrika word baie effektief geneutraliseer deur bloot die spoke van die verlede op te jaag en die populistiese mistasting subtiel (en soms minder subtiel) te verkondig dat blankes per definisie rassisties is (alle Duisters is immers Nazi’s, alle Moslems terroriste en alle Afrikane onnosel) Hierdie het by verre die maklikste, mees effektiewe en suksesvolste wyse geword waarop die regime blankes van legitimiteit stroop. Die realiteit is dat die donker skadu van apartheid altyd soos ‘n stank oor blankes en spesifiek Afrikaners sal hang en hulle kanse belemmer om ooit erkenning te kry as volwaardige Afrikane met ‘n rol om te speel. In hierdie verband blyk geen boetedoening ooit genoeg te wees nie. Die hart van die saak is dat die blanke, ondanks die feit dat hy geslagte lank reeds in Suid-Afrika woon, nooit sal aanvaar word as volwaardige Afrikaan wat kan beslis oor die lotgevalle van Suid-Afrika en/of Afrika nie. Meer as dit: blankes is by verre ‘n al hoe kleinerwordende minderheid en daarom is daar nog meer rede om hul te ignoreer. Hierdie loop van gebeure vind plaas ondanks die feit dat dit juis die blanke is wat die dun, wit lyn vorm tussen volwaardige derde wêreldstatus en die wankelrige instandhouding van standaarde. Verseker is daar stemme uit die geledere van Afrikane wat hierdie tendens uitwys en beveg, maar ongelukkig word hierdie stemme ontman deur hulle bloot af te maak as meelopers van rassiste (oftewel sg. coconuts ).

Hoewel ek nie sover sal gaan om mense aan te moedig om Suid-Afrika te verlaat nie, is ek verheug dat so baie Suid-Afrikaners geleenthede in ander lande aangryp om vir hulle aldaar ‘n beter toekoms te skep. Dit is immers oorspronklik hoekom die Europese setlaars die suidpunt van Afrika as tuiste gekies het. Die keuse wat individue maak om vir hulself ‘n beter toekoms te skep, moenie verkleineer word nie. Die geskiedenis van die mensdom, migrasie en die vestiging van nuwe volke is onlosmaaklik verbind tot die strewe na iets beters. En verseker is dit nie die “maklike” uitweg soos so dikwels verkondig word nie. Om uit jou gemaksone te beweeg, is deurlopend die moeiliker opsie.

Maar die realiteit is dat daar ‘n meerderheid is wat nie uit Suid-Afrika kan of wil padgee nie. En natuurlik is dit ‘n opsie om weens diverse persoonlike redes in Suid-Afrika aan te bly en in swak omstandighede die beste te doen wat jy kan. Maar maak dit dan vir jou makliker: hou op om teen die prikkels te skop. Besef oplaas dat Suid-Afrika ‘n Afrika-staat is met Afrika-probleme, Afrika-standaarde en middelmatigheid as maatstaf. Maak vrede hiermee…en met die feit dat jy nooit erkenning as Afrikaan sal kry nie. Jou vel is te lig en jou bagasie is bloot te swaar.

22 Kommentaar

Godskuns in Gayasan

November 11, 2009 at 11:54 nm (Korea)
Tags: , , , ,

framea8f93f7e0fc419f1bd8bcf6d0c4a9982becad7ed

Gayasan (geproklameer in 1972) is een van die kleiner van Korea se stuk of 20 nasionale parke, maar nie noodwendig minder indrukwekkend nie. Die park is te vinde ongeveer ‘n uur se busrit vanaf Daegu en is veral bekend vir die feit dat Haeinsa- tempel hier geleë is.

frame85965450f943623332de3cdf1c1314de67953625frame09855057177e74770d3199e13cccf89c74e039bc

Haeinsa dateer uit die 9de eeu en is opgerig tydens die heerskappy van Koning Aejang (800-809), die 40ste monarg van die Silla Koninkryk. Dit is ‘n UNESCO Erfenisgebied en nie om dowe neute nie. Want dis hier waar die Tripitaka Koreana bewaar word – die oudste en volledigste versameling Boeddhistiese skrifte in die wêreld. Dit is gekerf in Sjinese karakters op ongeveer 80 000 individuele houtblokke, gemaak van Koreaanse berkehout. Dit word gehuisves in die Janggyeong Panjeon, ‘n kompleks van geboue binne die tempelgronde. Die Tripitaka Koreana is een van die nasionale skatte waarop Korea baie heilig en trots is en dus word die geboue dag en nag bespied met geslotekring televisiekameras. Daar mag ook geen foto’s geneem word nie, maar ek is darem al by die tyd ‘n gesoute steelfotograaf.

frame8fd23c49eb18e79344ee57a71151f875aebe3ce2frame25a4c1d83ea1247bbc03bb2fd688020cd63a43bd

Die kerf van Tripitaka Koreana het sowat 16 jaar geneem en is in 1251 voltooi tydens die heerskappy van Koning Gojong, die 23ste monarg van die Goryeo Koninkryk. Dit is in 1398 na Haeinsa gebring, waar dit sedertdien bewaar word. Haeinsa self sien soos meeste ander Koreaanse tempels daaruit, maar dis die ligging van die tempel in Gayasan wat dit so spesiaal en die moeite werd maak om te besoek.

framed53ffaf4350c72a289eb6fc25159ba1246d095be

Dis juis in die herfs wat Gayasan tot sy volle reg kom en ‘n bondelose kleurespel tentoonstel, wat jou na jou asem laat snak. Dis ‘n natuurskouspel wat enige mensgemaakte skouspel laat vervaal.

framed9d049076aaafcf481290c7445f775214313b33aframedf0cfc43816c3537ce09bd8af9211bf95cf245f1

frame712845747310a1f56e21407144cbb8c77ddf62beframec0d3cbb0eab5f2aff1a86292ffc9779f09d5689e

Tydens herfs vertoon Gayasan eindelose kreatiwiteit wat in nimmereindigende skakerings vanaf God se palet drup. Kleure van dieprooi; pastelle van geel tot goud; wisselende weergawes van oranje; skakerings van bruin tot oker. Die verskeidenheid skakerings is as’t ware so groot en divers dat dit haas onmoontlik is om raak te beskryf. In die bome is daar ‘n swetterjoel voëls wat luid saamdoen aan die fees van kleur. Byvoeglike naamwoorde raak bloot ontoereikend. En deurentyd besef mens die ironie dat juis hierdie weergalose visuele simfonie die sterwensuur van die somer aandui.

framea68288baf5ac3b29ebe901eb5384808612bddfbfframe76f814d469c696ec0520551d485b0494f06079d5

frame0f3e2295edbd01df8ce5137dd390f03c4184c999framebf6d4b7ca35a7e460d20f4c5ee247fcc8f3e78b8

Ek kan sekerlik nog baie gedagtes pen oor die emosies wat die ervaring in Gayasan in my wakker gemaak het, maar ek voel dat my woorde reeds nie reg laat geskied aan die ervaring en die beelde wat ek hier plaas nie. Want dis einde ten laaste niks minder as Godskuns wat ver buite die sfeer van aardse woorde bestaan.

frame0c17440f6de222f5b0360489ff6e2ac44bf5db55

NS: En nou laat ek herfs gaan…staal myself vir die vaalheid van winter…met die hoop dat sporadiese sneeu tog die eentonigheid sal breek.

6 Kommentaar

Nuut uit Hyundai se stal

November 5, 2009 at 11:17 nm (Korea, Motors)
Tags:

Hyundai het al ‘n ver pad gevorder sedert 1967 toe hierdie motormaatskappy in die lewe geroep is. Tans is Hyundai (wat die Kia-handelsmerk insluit) die vierde grootste motorvervaardiger in die wereld in terme van jaarlikse motorverkope(naas Toyota, General Motors en Volkswagen ).

S7307220

Jare terug het mense vir jou gelag en snedige aanmerkings gemaak, sou jy ‘n Hyundai bestuur. Dan het jy hom ook maar so sku-sku uit die motorhuis getrek. Om eerlik te wees, was die eerste Koreaanse motors waarmee ekself kennis gemaak het, maar swakkerig afgewerk en nie op die standaard wat mens aan gewoond geraak het van Europese en Japannese vervaardigers nie. Die goed was effe blikkerig en raserig. Die motors se kwaliteit het deur die jare egter dramaties verbeter en deesdae lag mens nie meer vir Hyundai nie. Motor-entoesiaste en die motormedia is dit eens dat Hyundai nou op gelyke voete saamgesels met die res van die motorwereld. Dit is bevestig toe Hyundai se luukse Genesis verlede jaar aangewys is as Noord-Amerikaanse Motor van die Jaar. Kort daarna het Hyundai die aantreklike Genesis Coupe bekendgestel, wat eweneens geesdriftig deur die kritici ontvang is.

S7307184S7307187

S7306956S7306955

Hyundai se mees onlangse toevoeging tot sy stal, is die aantreklike nuwe Hyundai Sonata. Hoewel die nuwe Sonata eers volgende jaar in meeste oorsese markte vrygestel gaan word, is die motor reeds algemeen te sien op die pad hier in Korea. Ek dink die nuwe model is in terme van stilering ‘n reuse verbetering op die ou Sonata en definitief beter om na te kyk. Die Sonata is in ‘n 4-silinder 2.0 liter en 2.4 liter beskikbaar, asook ‘n 3.5 liter V6. Sy prys in Korea wissel tussen R150 000 en R180 000 (teen die huidige Rand-Won wisselkoers). Die motor is aansienlik groter as die vorige geslag Sonata en in alle eerlikheid ‘n bietjie groot vir my – ek verkies klein, blitsige motors. Die motor bly egter aantreklik en behoort strawwe kompetisie te bied in sy klas, veral in die mededingende Amerikaanse mark.

15 Kommentaar

Effektief, vinnig, veilig en goedkoop

November 1, 2009 at 8:49 nm (Korea)

S7307011

Nou die aand, toe ek weer by ‘n busstop staan en kyk na die elektroniese bord wat aandui dat my bus nog 3 min. ver is, besef ek opnuut hoe gestroomlyn Korea se stedelike busstelsel is en, inderdaad, hulle hele openbare vervoerstelsel.

Hierdie elektroniese borde is reeds in gebruik in al die groter stede en is ook besig om uitgebrei te word na kleiner stede en dorpe. Die bord vertoon al die inligting wat jy nodig het, asook die weervoorspelling en ‘n klein televisieskerm waarop tv-programme en/of advertensies vertoon woord. En as die bus se volgende stop die stop is waar jy wag, verdwyn die aangeduide minute en word dit vervang met ‘n glimlaggesig.

Die aanduiding van die presiese tyd wat die bus gaan vat om by jou busstop uit te kom, vergemaklik mens se reis, aangesien jy nog op die laaste ‘n paar goed kan doen, as jy sou sien jy het nog tyd om mee te speel.

Die stedelike busse en interstedelike busse is ook eentonig reelmatig op tyd. Ditto vir die treine en moltreine. Oor die algemeen is die hele openbare vervoerstelsel in Korea ontsettend effektief, vinnig, veilig en goedkoop. Daar is in der waarheid bitter min plekke in die land wat jy nie met openbare vervoer kan bereik nie. Jy kan dus in geheel sonder ‘n voertuig van jou eie oor die weg kom. Dis hierdie totale en veilige onafhanklikheid van beweging wat mens ontsettend mis wanneer jy weer die dag in Suid-Afrika kuier.

24 Kommentaar

Herfs as halfweghuis

Oktober 27, 2009 at 11:21 nm (Korea)
Tags: ,

frameb7e2cfb24457a21aa0392a2b9c04a71fa6a48297

Ek het myself reeds baie afgevra hoekom herfs my gunsteling seisoen is. Ek het tot die slotsom gekom dat herfs daardie seisoen is wat die beste reflekteer wie ek is, of ten minste wat ek streef om te wees.

frame0e3901f92160eb355280a6946d5c330e3fa285b3

Die herfs bring ‘n bepaalde rustigheid en vrede. So asof die natuur, na die ekstreme hitte, asem skep en vir ‘n oomblik stilstaan; amper of die natuur skielik in stadige aksie beweeg. Anders as die ongemaklike temperature van die somer en winter, is herfs gematig. Herfs is subtiel, genuanseerd, en omsoom ‘n tipe misterie wat ontbreek by enige van die ander seisoene. Selfs met die indrukwekkende kleurespel wat so opvallend is in Korea, behou herfs ‘n bepaalde waardigheid, gestroop van die uitbundige ekshibisionisme so tekenend van die lente .

frame9975948f6972cdb9f60b4dfc2f7b8e8456bb0063

Dis die koeler korter dae, die wye blou lug, die goudryp ryslande, die stadig verkleurende bome wat mens weer tot stilstand dwing en vir jou ruimte skep om jou eie gedagtes te orden; momenteel dit te verberg van die alledaagse geraas. Dis ‘n seisoen wat weer waardering bring vir die voorreg om net te wees.

frame8d52ca55f6d2b7c71a01f45b6f3246240a2b7ea1

Maar dis bowenal ‘n inspirerende en geborge halfweghuis waar jy kan rus en voorberei vir die ongenaakbaarheid van die komende winter. En nerens vind ek hierdie halfweghuis so helend as hier waar ek tans woon nie.

frame6ebff66e84ab295b176996c866687e979992bd72

19 Kommentaar

Vrydagaand-song XVIII

Oktober 23, 2009 at 11:46 nm (Musiek, Om te onthou)
Tags: ,

DIE KAPLYN – BOK VAN BLERK

Ons vergeet so maklik en so gou…

4 Kommentaar

Ballingskap

Oktober 19, 2009 at 11:17 nm (Lukraak)
Tags:

Ek het lank getob oor Piesangverkoper (ek sluit die skakel in, maar op die oomblik funksioneer sy blog nie…en hy het nog nie die probleem reggestel nie! ) se vraag oor die titel van my blog. Eers het ek die lang, omslagtige antwoord geformuleer, maar by nabetragting het ek hierdie antwoord te skel en negatief gevind. Daarom verskaf ek na keuse eerder die gereduseerde antwoord.

Ballingskap dui vir my op die tydelike en voorveronderstel ‘n moontlike terugkeer na die geboorteland. Daarenteen verteenwoordig emigrasie ‘n meer permanente toestand waarbinne ‘n terugkeer na die geboorteland nie voorsien word nie. Wat ballingskap (ironies genoeg) impliseer is hoop…die moontlikheid van veranderde omstandighede. In lig hiervan:

Die titel van my blog, Boer in Ballingskap, val lekker op die tong, maar dis nie al rede hoekom dit die titel van my blog is nie. Ek bedoel ballingskap in die tradisionele sin van die woord, nl. dat ek huidiglik die keuse maak om, weens ‘n sameloop van diverse omstandighede, eerder in ‘n vreemde land te woon, as in my eie geboorteland. Dis ‘n rasionele keuse gebaseer op die ontleding van ‘n stel spesifieke realiteite.

Dit is so eenvoudig soos dit.

29 Kommentaar

Uit my BiBlioteek

Oktober 14, 2009 at 11:27 nm (Boeke)
Tags: , ,

S7307009

Enigeen wat belangstel in wereldgebeure, internasionale tendense en ekonomie, sal Fareed Zakaria se The Post-American World boeiend en interessant vind. Zakaria is die gerespekteerde redakteur van Newsweek en aanbieder van die program Zakaria GPS op CNN.

Die boek kyk toekomsgerig na die skuiwende magspole in die wereld en fokus op “the rise of the rest“, soos Zakaria dit noem. “The rest” dui op die politieke en ekonomiese opkoms van ‘n verskeidenheid lande, met die sogenaamde BRIC-lande (Brasilie, Rusland, Indie en Sjina) aan die voorpunt. In hierdie verband skenk Zakaria verstaanbaar die meeste aandag aan die opkoms van Indie en Sjina. Die inhoud is boeiend, logies uiteengesit en met selfvertroue geskryf.

Sommige van die gevolgtrekkings en analises laat baie ruimte vir kritiek. Ander van die geskiedkundige analogiee en afleidings is debatteerbaar. Daar is vele gedagtes, voorveronderstellings en kreatiewe denkspronge. Soms kom dit voor asof Zakaria populisties omgaan met feite en plooi om sy eie oortuigings te staaf (soos maar meermale die geval is in populere boeke oor sake-van-die-dag). Hy noem byvoorbeeld vir Kenia (die 82ste grootste ekonomie in die wereld) in dieselfde asem as Suid-Afrika en Brasilie, maar laat na om Nigerie (die 41ste grootste ekonomie in die wereld en die derde grootste in Afrika) te noem. Inderdaad is daar baie kritiek te lewer, sou mens puntenerig wou raak.

Mens hoef egter nie met alles saam te stem wat Zakaria skryf nie. Die waarde van die boek le juis daarin dat dit debat ontlok en mens weer laat herbesin; jou weer dwing om jou eie standpunte en oortuigings te verken en aan te pas. In geheel bied die boek ‘n baie goeie analise van internasionale betrekkinge en hoe dit wat vandag plaasvind, die toekoms gaan vorm.

Aanhaling:

“Things went badly for Britain from the beginning. It had more men and better weapons and was fielding its best generals. But the Boers were passionate in defending themselves, knew the land, had the support of much of the white population and adopted successful guerilla tactics that relied on stealth and speed. Britain’s enormous military superiority meant little on the ground, and the British commanders resorted to brutal tactics – burning down villages, herding civilians into concentration camps (the world’s first), sending more and more troops. Eventually Britain had 450 000 troops in southern Africa fighting a militia of 45 000.”

The Post-American World, W.W Norton, 259 bladsye, $15.95

11 Kommentaar

« Older entries